VegabréfEkki þarf að taka upp norskan ríkisborgararétt þótt búið sé í Noregi um lengri tíma enda njóta Íslendingar allra réttinda í landinu með sinn íslenska ríkisborgararétt fyrir utan að þeir öðlast ekki kosningarétt til þingkosninga. Norrænum ríkisborgurum er auðveldað á ýmsan hátt að taka upp norskan ríkisborgararétt, ætli þeir sér það, og gilda mun vægari reglur um þá en ríkisborgara landa utan Norðurlandanna og utan Evrópu.

Tvær leiðir eru tækar í þessum efnum og getum við kallað þær tveggja ára leiðina og sjö ára leiðina til aðgreiningar. Í báðum tilfellum þarf að hafa fengist lausn frá íslensku ríkisfangi, það er gert með einfaldri umsókn til Útlendingastofnunar. Hafi sú lausn ekki fengist fer veiting norsks ríkisfangs á bið þangað til.

Tveggja ára leiðin: Sótt er um norskt ríkisfang eftir tveggja ára búsetu í landinu. Umsækjandi þarf að vera minnst 12 ára gamall, geta gert grein fyrir sér (sannað að þetta sé hann/hún), má ekki hafa hlotið dóm fyrir refsivert athæfi eða sætt nauðungarvistun á geðsjúkrahúsi. Að auki er krafist 300 klukkustunda norskunámskeiðs EÐA skjalfestrar lágmarkskunnáttu í norsku eða samísku. Umsóknin kostar 3.500 NOK og ferlið getur tekið allt að hálfu ári.

Sjö ára leiðin: Norsku ríkisfangi er lýst yfir (n. statsborgerskap ved melding) á næstu lögreglustöð eða skrifstofu útlendingaeftirlits eftir sjö ára búsetu í landinu. Viðkomandi þarf að vera fullra 18 ára og má ekki hafa hlotið fangelsisdóm eða sætt nauðungarvistun á geðsjúkrahúsi. Þarna er ekki um neina umsókn að ræða, þetta kostar ekki neitt fyrir utan það sem greitt er fyrir nýja vegabréfið og krafan um norskunámskeið eða skjalfesta kunnáttu í málinu er ekki til staðar.